Ka Vanin Kawng - II (No Entry)

Class VIII zawm tur chuan engkim tifel turin Principal te inah chuan kan lut a, ka pa nen chuan a indawr a. Ka rei, Inchhung hi a va fai em! Bangah lah chuan ka hmuh ngai loh hmuhnawm a va tam em! Ka mit chu a tlai ngei mai, mahse rin loh lamah ka pa chuan ‘Mama hetah hian i awm nghal ang a, kei chuan ka hawsan dawn che nia’ min rawn ti a. Ka hnual rawih a mahse cheng sawm (Rs 10/-) min pe a, nasa taka tihlawmin ka awm leh ta zawk a.

Ka pa haw atanga rei vak lovah chuan tlangval lian tha zet mai, ngo vuah mai hian min rawn be ta! Rawn lut thar kha i ni em? min ti a, chhan tur nge chhan loh tur tih ka ngaihtuah laiin midangin min lo chhan khalh daih lehnghal. Hlauh tur nge tih (trih) tur tih ka ngaihtuah laiin, min bazar pui dawn tih min hrilh a. ‘Kal ang le’ a rawn tih chuan ka phu zawk a, din ka’n tum a, ka lo ding reng tawh a. Kan inzui chhuak ta chu le(h)! inzui a zawngah hian kan inzui ber awm e, a hniak ka chhinchhiah zel a, a rahnaah chat chat ka rap ta chaih chaih mai nih chu.

Khawiah nge mi hruai zel dawn ka hre lo na a, ka zui zel a. Dawr pakhatah min luh pui a, ka mamawh a lo awm kim vek! Chutiang dawr chu khawvelah hian a awm tih ka hre miah lo! Dawr lo nghaktu chuan ‘Mama’ a tih apiang chuan, ‘eih’ ka lo ti ve hman ziah lehnghal, min hruaitu zawk kha a ko tih ka hrechhuak veleh mai zel bawk a! Masi dawna kawr tial thar pakhat nei ve chauh thin tan chuan, School uniform mahnise a thar vek han neih chu nuam tak a ni. (Tuna ka ngaihtuah let hian, kan thil leina dawr hi MA-I ENTERPRISE (Angaiha nu dawr) niin, min hruaitu pawh hi U MAMA (fam) S/o Madam-i ni ta in ka hria)

Hostel-a awm nghal tur ka nih avangin dawm (Dormitory)-ah min hruai phei a, kan khua atanga lut ve unau thum an awm tih min hrilh hnu chuan ka za zek zek tawh a. A tuk maia pawl riat pass nghal tur ka ni emaw ka ti hman a. Thingtlang naupang fel tih takah midang thil khawih hlauh vang pawh nilovin, nachang hriat loh vang hrim hrimin khum ruak pakhatah chuan ka neih zawng zawng nen ka thu ta reng a. Pricipal te in a ka thil hmuh ngaihtuah chung zelin hmuhnawm ka zawng leh tan ta. Yes! Ka hmu e! mahse hei zet chuan ka ngaihtuahna a tibuai hneh hle mai.

Mizo sikul atang chawrchhuak ngat ka nih avangin saptawng ka thiam tlem a, mahse ka thiamah ka chiang thung. Khai mah aw:- ‘What enge Also pawh Because avangin Never ngailo, With nen’, hei bakah hian Good = tha, No =aih tih leh Yes= aw tihna tih ka hre tak e. Thlamuang taka kha khum ruaka ka awm hle hle lai khan he thil hian min rawn tibuai tlat, mite tan chuan a ho pawh ni mai thei, ka tan chuan buaipui tham tak a ni. Chu thil chu thumal pahnih lek ‘No Entry’ tih hi a ni. Ka saptawng thiam zawng zawng zingah pakhat chiah a tel bawk si. A awmzia tur ka ngaihtuaha, ka hre miah lo. Hriat ka tum tlat bawk si, tumah zawh tur an awm bawk silo.

Thlansa bat khawpa ka ngaihtuah pawh a ka hriat loh hnu chuan tih dan dang ka dap ta a. Rilru leh ngaihtuahna zawng zawng sengin ti hian ka inngaihtuah chhuak ta a, ‘a chunga awngah hian zuk bihthla ila, a chhunga awm atangin ka hre thei ang’ ka ti ta a. Mahse buaina dang ka nei, zuk bih ta ila enge lo awm ang? En phal loh thil an thuhrukna a ni angem? Ka bih lai min hmu awm se, engtin nge min tih ang? a va buaithlak tak em! Engpawhnise thih leh thih, dam leh dam tiin ka zuk bih a. Ka va lawm em! tuman min hau lova, tuman hmu lo bawk. ‘No Entry’ chhanna ka la hmu zui. Ka zuk bih zuaih khan bucket ka hmu! Chuta tang chuan hei hi ka hria ‘No Entry = Inbualna !’ tih hi.