APU NAKTEA

He khawvela sial ang ka lo seilen ve lai a, sazu vaivut bara ka tawlh hruah hruah lai te khan Apu Naktea a lo ni dim diam tawh a. Tualchai rual ka nih atang khan Apu Naktea lo chu boss dang ka nei lo. Engkim a thiam a, engkim a hria tih kha ka utawk tur vawn hmiah!

A ni taka, thinglawn nise zawng (monkey) pathum a um hlum tawh emaw tih tur khawpin a thiam a. Van rim nam vung vung khawpa sangah pawh a lawn ngam tlat.! Thei (fruit) lawh te kha a hneh lutuk tlat, a kawrhma seh a, a rawn fun thla tawk zel. A kid te tan chuan bansan mai mai phal chi a ni lo. Ka tan ngat phei chuan a kid no. 1 nih kha tum loh phal chi a nilo; ka kal theih lohnaah min kai a, ka lawn theih lohnaah pawh min dawm cheu! Chumai a ni nem, ka ei phak loh min lawh a, ka ei ngai loh min hawn thin tlat alawm.

Infiamna lamah thiam loh a nei miah lo! Olympic-a goldmedalist aiin ka chhuang daih zawk. Amah vang liau liauvin KAWN VENG NAUPANG kan hneh a, kan ngui ban hial.! A tel lo chuan kan inkhel ve thei meuh lo, a chhan chu ball rim a hre tlat. Keini thingtlangah pawh tlangchhipa awm tih takah kan fil (field) atanga ball liam chu hmuh har tak a ni. Kham pathum vel zawh thlak a ngai deuh ziah! Chuta chinah chuan hlauhna in min nang a, ball liam um nih kan intheihngilh tawh thin. Apu Naktea chuan chung zawng zawng chu a pawisa lova, a kid te pet liam anih phawt chuan a um hnial lova, a hreh hek lo. Tuma hmuh zawh loh, kan vai (apu naktea tello) a kan zawn hmuh zawh loh pawh Apu Naktea chuan, dahsa la ang maiin a zuk thurchhuak leh kauh thei nia.!

Thingtlang naupang tih takah ramhnuaia pipu suih te kan hrat a, chung zawng zawngah chuan a khaipa nih a tlin thin hle. A then thui lai tak pawn chatin Apu Naktea chu tla se, a tap ve ngailo! A er ngelh ngelh a, a lo tawng thei ve leh mai thin. Boss nih kha a va tlin em!

A tawlailir mawlh mai kha a tlanchak, mi feh haw, theih-pa-tawpa rit phur, chau lampang, kal chak thei tawh lo te kha kan lehpel zut zut thin a, kan aupui nasa thei asin. A kid te tihtur min tuk chuan lawm takin kan pawm thin. A chhan chu chhovah 'min nawr r'u' a ti ve ngai lova!! Tawlailir ke a hnawih tur tel (oil) hmuam ru tura min tih pawhin, biang puar ful (full) pawpin kan hmuam thin! Apu Naktea thupek a ni tlat a.!

Ka tan bik phei chuan a va tha in a va fel em! A chawtlang ken te mi eiban a, mei kan chhem pawn hmawlh fawm min awltir a, a tawlailirah a hmaah mi chuantir a, pipu pawh min uai hmasaktir thin. A thei lawh pawh a lian tha tha mi pe a, inkhelhnaah pawh mi pet goal tir hial.!

Chung zawng zawng chu ka tan a hlu lutuk a, a sâng êm a, ka phak lo a ni. A hnena lawmthu sawina chang ka hre lo kha ka va inchhir em! Âwm chum meuhin ka inchhir. Tunah zawng vangkhaw hmun lova lengin, tuanna mual a dang ta. Ka tan erawh i hlui lo, hman atanga tun thlengin ka tan, kei ka tan chuan APU NAKTEA i la ni a, i ni reng bawk ang.