Ka Tlangval Lai Chuan (Zan Lungngaihthlak)

Thingtlang tlangval mawl ve tak, rual awhna nei hran lo, mi tana hnawk sak lem lo ka ni a, Sunde sikula Pathian thu kan zir bak hriat belh tlem tak ka ni. Chan tawka lungawi lohna pawh nei lem lo ka ni. Khawvel sum leh pai dinhmun tlachhiain min tibuai lova, pawisa thleng hlutna tlahniam phei chuan ka nunah thu a sawilo lehzual! Khuanu ruatah lungawi loh chu sawi loh mahni mum a mum ve tawp mai ka ni a, thingtlang loneia eizawng kan nih avangin, hlo thlawh hunlai chuan khawchhungah ka awm ngai meuh lo.

A hminga tlangval ve nafam chuan, ngaihvarung thrawn te pawh kan neilo a ni bik lova. Mahse computer age a cheng lanu leng te chu keia tan chuan lianchung leng an chang zel si. Chutiang dinhmuna ka din laia, an naupanlai ka hriat chian ve em em ten a mal mum tha tha an thlang zet zet te pawh thikna chang zu han hre miah lo a!

Kan khua hian ram kan neih zau tha em em a, ka ramriahna atang pawh chuan kan khua aichuan khaw thenawm a hnai zawk hial a. Chawlhni te hian haw lovin kan cham tlang mai thin reng a. A chang chuan khaw thenawmah chawlhni te ka zu hmang ve zeuh thin bawk.

Chutia chawlhni ka hman zeuh zeuh takah chuan hmel hriat an lo pung a, pawnthuah khai lai tan chuan thildang vak melh hleih theih hek loh le! Tu emaw a lo lang ta tlat mai. Hlo thlawh a nuam a, ramriah a hrehawm ta reng reng lo! Tu emaw ngaihtuah chung zelin thawhtanni atanga inrinni thlengin phur takin hna ka thawk a, chawlhni-ah phur takin mahni khaw hnungchhawn meuhin ka liam ta vut vut mai.

A hming ka hriat hma hauhin ka lo ko duat ve em em ringawt a, kan inneih huna ka duat turzia phei chu hria se min luhkhung duh hial ang! Ka vei a ni satliah lo, vei a zawngah hian ka vei ber ang (veikhawr ni kher lo mahila!). Zankhat chu le! Kutthing meuhin kan han inchibai mai chu(h)! 132KV line ka khawih emaw tih tur khawpin ka trek chuaih a, a thim thut a, a lo nui ver ver kan hmu leh phei chu(h), biakin kawt chu nilo se ka va han au nasa dawn em!

Ani nula fing tih takah leng turin min han sawm zui a, Good Friday dawn zan mah nise zan lungngaih thlak a va han nilo chiang em! Leng tura han zui haw nghal mai nachang hre hek lo i, ka lut ngam ta tlat lo mai le. Engtin nge ka tih ang aw….. ka luh loh chuan a hmel ka hmu dawn silo, hmuh ka chak si. Ka zahzel ka dap fu ta! Ka dumbur (vaihlo dahna) ka phawrh sawt sawt a, ka rawl (roll) nuap nuap a, chuanlama tranna tur dil tumin ka va veh threm threm a, kawngka atanga ka bihlai takin kawngka a rawn inhawng! Ka hmui, a na lutuk. A vung kawh vek, chuan lam tur a vang duh teh sin aw……