LO ZIN VE TEH

Kum 100 chuang zeta upa ni tawh mahse, mi khuate tihdanin a kum za tlin lawm ve bung bung lo mah ila, lo zin ve reng reng teh. i inchhir lovang. Fur lai ngeia Motor a lo zin i duh anih chuan ngai teh, a kal kawng ka han hrilh hmasa ang che. 

Power House sumo stand-ah khan sumo \angkai hmel ber mai, uluk taka enkawl loh tih hriat tak, a rawng \ial mawi tawka chirh kai kha han zawng la, i la hmu thiam lo cheu a nih chuan sumo i hmuh zawng zawng zinga thil/bungraw phur vum ber kha han zawt chawt mai la, i zawt sual mawlh lovang. Ticket lak tum a, ticket counter i zawng anih chuan he India ram zau tak pawh hi fang chhuak vek mahla, i hmu hauh lovang le.

I leng ve dawn nge dawn lo i zawt anih pawhin zawt chik vak suh. A khalhtupa-in ‘I leng’ a tih chuan i leng a ni mai. i chuanna tur seat nambar pawh zawt buai duh suh, i duh duh naah khan \hu tawp rawh. Mikhual i nih tlat avangin tuman an hnuk sawn lovang che. A chuang tur zawng zawng in kim tawh emaw i tih hnuah rei fe in la ding anih pawhin ngawi hram hram rawh. Nakin lawkah a khalhtupa fawnte a lo ri ang a, tu emaw chuan a chuan leh dawn loh tur thu a rawn sawi anga, in kal ve mai ang. 

 Tichuan le! RV leh Phunchawng in tlan pel thei \awk ang a, hmun dang erawh tlan pelh harsa a awm tawh lo. Motor chhungah a khalhtupa berin sikret (Cigarette) a zuk pawhin rimchhia i tih thu chhakchhuak hauh suh ang che. Midang pawhin rimchhia an tih thu an sawi sup sup mai ang! Hmabak huphurhawm tak hmachhawn turin Lengpuiah chawlh hahdamna hun in hmang ang a, puar el euhin ei ang che. 

Metal road thui vak lo in zawh leh ang a, i rin loh lamah in kawi thut ang. Chu ngei chu a ni, kan khaw kawng chu. Fura a diak tluk zeta chhah hian \halah a vut dur leh \hin asin. Hetiang kawng kan nei hi kan inchhuang hauh lo na a, mahse kan khaw kawng anih miau avangin metal road ni ve lo mahse kan sit phal hauh lo. Motor tang nawr chhuah a ngaih chuan lo phe buai ve lo la, mikhual na na na chu kan lo awl ve ang che. Kawng tluanin Pathian hlat lovin, amah nen inpawlna hun \ha in nei tluan zak ang a, \awng\aina hmun in thlen meuh chuan lawmthu sawi tur i va ngah dawn tak em! 

‘Heti taka kawng chhe si engtin nge in awm peih’ i ti anih pawhin kan dem hauh lo che. En ta che, khua i lo lut chiah a, naupang tualchai hlim zia saw i hmu em? Anih loh leh, khi lai tleirawl hawklak nui thawmah khian i-pikna inthup awmin i ring em? Khuah khirh tih in hre map lovin saw lai uipui pawh sawn laitual a leng vel asin! Kan hma lawka nula kal pawh sawn thlang sappui val a ngai bil lo. 

Kawng laka driver meizu an ngawih bosan khan i rilru a luah zui tawh lovang a. A khu i hip luh khan Cancer a thlen thei tih phei chu i hre lo a nilo, i theihnghilh hmiah tawh ang. Hmun hmingthang tlawh tur nei hran lo mah ila, a lokal apiangten an thlir nin loh Vaisam tlang chip zum mawi em em mai en pah a, han vei thlek zeuha Thlawhtheihna \um hmun chiang taka lang te hian, i mit a titlai pha ve mai thei asin. 

Vanram kan panna kawng a bum boh ang bawkin, keini zawng, kan khaw pan tur hian kawng a la bum boh rih em a ni. Kristian Vanram kawng zawh thawnthua Kristiana ang khan, he lungngaihna chirhdup ni mai awm paltlang ngei hian, kan khuaah LO ZIN VE TEH.

LENG LEN

Thal khaw ro leh nipui khawlum uap churh ten mual min liam san a. Fur khawthiang kara lunglen thu hril tur nei ve ta lo chu; chhawrthlapui eng lawmin HOLLOW GUITER nen thianzahoin kan zai ve tleng tleng a. Rual u deuh te nula rim haw rualin kan t(r)in ve leh mai thin.

Chutia tlangval-a-pum-pa (ti ve tawh mai teh ang) zantin zai chu hlathiamin a daih ta lo mai dawn a. Chubakah chhawrthlapui pawhin min liamsan dawn ruai chu a ni si. Sawrkarin an sem anih ngawt loh chuan, chhai lovin di ka tawng dawn silo. Rilruin tum tawk a zawng a, hmelin a phu tawk mit lamin a melh kan zel si. 'Hraileng chawi lovin val ka fam mai awm e' tih hla sak t(r)um phei chuan, fam tak tak hlauhawm tak a ni. Di nei lo Pawlan a sâi an la ti zui.

Chuti taka val rilru buai leh baihvai chuan, di chhai zai rel mai loh chu duhthlan tur dang neiin ka inhre ta lo. Rual u zawk te zuiin bul chu ka t(r)an ve ta. Mahse lung a dam thei lo, thusawm pek zinga pakhat 'Awt suh' tih bawhchhiatna mai a ni. Furpui thla êng ka zâi thim th(r)ak tawh a, vangpui zanlalnu pawh rual u te hnung ka zui hlanin a tla chu a ni leh ta ruai mai le!

Thlasik a lo int(r)an a, 'Lal piancham' lo thleng tur chuan ka tan thla a rawn dêt a, bethlehem arsi ang maiin ênna min rawn thlen hial. Chumai a ni lo, engtiklai maha ka dawn ngai loh ka tan chanchintha lawmawm em em 'Lo leng rawh aw' ti a, biahzai anka nem ka hnenah a rawn thlen asin. Hei aia sikni êngmawi hi awm tak ang maw.

Sawmtute hnar lova len ngei chu ka tum ta a. Khami ni kha 'Lalmanga nu lawm rawih ni' ai pawhin a rei zawk hialin ka hria! Theih chu nise ni kha zuk nempil mai ka duh rum rum hman a, mahse ka nempil hmain a tla ve ta hram a! Theih tawpin ka inchei uluk ve a, ka phur ngei mai. Darthlalang kha tawngthei chu nise, ka nuih vur vur reng chhan kha min zawt ngei ang.

Lênglen arkhuan veleh a rang a rangin ka kawhchhuak ve nghal a. Ka lenna tur a hla lo bawk a, ka thleng hma ngei mai. Rual u te zarah kawngka bula inngaihtuah that chiam kha ka sim ta hlauh a, a tihzia fu. Kawngka ka kik karh karh a, tuemaw te te chuan 'Lo lut rawh u...' a lo ti nem diai a. Rilruin AMEN tiin ka lo chhang vat a.

Ka hisap tel loh leh ka beisei loh tak maiin, chhungkaw kimin TV an lo en a, thutthlengah an leng tawk chiah! Khawnge ka thut ve ang le??? Let leh aichuan tiin ka lut zel...! Khawilai tlarah hian nge ka inzeh dawn? Ka va buai em! Chhuatah hian ka th(r)u dawn nge, a sirah sawn ka ding ang? A sirah pawh ding dawn ila, khawilai sirah ber sawn nge ni ang? Let leh nge zahthlak ang, a laia din? Rilrubuai vangin ka fam lo chauh a ni ber e. Mahse, a thutna atangin a lo thova min thuttir ta hlauh. HA...LELUIAH.! Ka thawl huai mai.! I zeiin, i va duhawm reuh tak em.!

RAWLLAI NI

Naupanchhiat a reh a, uite rimin min tlanchhiat san a. Mahni phak tawk te te melhin mit a hlei tan a. Tu khaw hriat lohin duh leh duh loh ka thliar hrang a, ka neih zawng zawng pawh pe dawn ila, min duh dawn lo tih hriat ngawih ngawih te pawh ka rim ve ta tlat mai le!

An hriat loh hlana ka lo duh ve em em ten min han biak that deuh chuan ka hawi sang ve larh a, tu-khaw-hriat-lohin ka lo lawm ve em em thin. An lakah te khan huatthu ka lo pe chhe ve thei khawp mai. Tuemaw an biak hlek chuan ka lo t(r)êk chuai chuai a, a biaklai la la khan va talh mai ka duh thin.

Thianzaho a kan awmkhawm te pawh khan, 'Chu chu kei' nang chuan 'A ni saw' tiin, a thuin kan lo ralkhat thei insem tawp zel a. A huai deuhin an chang tha a, kei thiante zingah pawh a duapkai ka ni bawk a, chang tha lo ve thei tak ka ni. Mahse a sawi rawtui thiam ber na na na chu, an duh loh ber chang mah ila a tawp a tawpah chuan (a thu bawkin) min chhuhsak leh nge nge thin.

Zankhat chu le, ka thianpa nen tlai lama kan thurel bawhzuiin, nula (keini tan chuan nula a ni tlat!) rim turin kan thawk chhuak a. Kan chhungte kan hrilh thlap! An remti ve mai bawk. Tichuan, kan chawlhni kawr tih lovah chuan kan thawmhnaw neih that ber tur ve ve kan inbel a, pheikhawkpum ngat kan bun a. Chumai a nilo, kan chhawngkaw tana zan tam êntu lo ni tawh TORCHLIGHT ngei mai chu kan keng a. Kan phur dun ngei mai.

Zahna leh huphurhna ten kan kawng mil dal lova, kawngka kik kher pawh a t(r)ulna kan hre hek lo. Kawngka bul atang chuan ring mang khengin 'Hruaiteii a awm em?' kan han ti tawl mai a(h). 'Awm e' an lo ti ve mai bawk a! Rin-a-lova uibuk sa an tih ang mai khan, rin loh takin kan hlawhtling ngang mai. A nuin thingpui paw min lo lum! Chu ringawt pawh chu kan tan chuan hlawhtlinna bupui keu hawn tluk anih vei nen, balhla te min la hawntir deuh deuh lehnghal.! Rei pawh leng ta lo chuan t(r)in zai kan rel a, a va lawmawm em! A nu phalna thlapin a lehkhazir laklawh kalsanin min rawn mangtha thlap.

Khang hun te kha pawl delh ruahin vawi engemaw zat delh tawhin, delh thuah îm êm tawh mahsela, furpui vawi tam tak la tuar leh dawn pawh nise. Pawl delh ruahin a delh bo zawh loh chu 'Furpui ruah baw-hawk pawhin a nan zawpin a lenbo dah lo'ng e' ka la ti ve fan a!

TUAHTIRH 'D'

Favang thengthaw nuam tak hnuaia Jonal Sport nei tura inbuatsaih zingah chuan a laktlak loh ber pawl ka ni mai awm e. Ka theih zawng hriain kan zirtirtute chuan March-past-ah min teltir ve a! Ka tlin lohna tinreng hmuh kan a, nui miah lova min thlirtu kan zirtirtute kha an va fakawm tak em! Khaw danga kal tur kan nih avangin kan zir ngun tlauh tlauh bawk a, mi ruala kal na na na chu ka thiam ve ta.
A hun a lo thleng a, Sport tan nan leh intihsiakna hmasa ber atan March-past turin kan intlar a. Ka phur lutuk chu ka phurthak lo chauh a, rinphak bakin mi an tam a, ka lungphu pawn hna a thawk tha mawlh mawlh viau. Chutia kan intlar lai chuan alawm, ka rin loh leh ka beisei phak loh ka tawng ta! Ka sir dinglam atang chuan lungte a lo thlawk phei zauh, ka hawi phei, min vawm na ang tih hlau niawm taka inthlahrung hmel mawi leh duhawm mitmeng hmangin min vawmtu chuan min lo melh reng chu niin! Haleluiah ti a au tuarh ka tum zuau zuau hman tih chuan, khuang a rawn ri thut. Ka phu zawk a, ka kal ta awt awt a.
Min haw lo tih hriat fahrana min vei melhtu chu ka rilruah chuan a cham ta tlat mai le! Ka ngaihtuahna latu chu tunge anih ka hrechhuak mai thei lova, ka hmuh tawh hnu erawh a ni tih ka chiang si. Ka thianpa ka zawt tawp, min hrilh a, ka var uai uai a. Ka mur chem chem bawk. Khualkhua atanga kalte kha min sem darh a, keipawh ka thianpa nen kan thleng dun nghe nghe. Kan thlen inah riak lovin, an fapa indang tawh khan min bawl peih em avangin kan nel ta phian a. An ina riak turin min sawm a, lawm takin kan pawm a. An in thlen hmaa in pakhata kan luhnaa tleirawl chhelo deuh ka hmuh kha a lo ni reng a.
Kan lam zo (ti tawh mai teh ang) engmah tihtur nei tawh lo, mahni sikul tan a au chiah hmabak nei ka ni tawh bawk a, ka taksa chu a awl der der viau. Ka thinlung erawh kha tleirawl ngaihtuah khan a hman hlel thung. Ka va melh a, melh lo ang deuh a melh te ka tum a, a tih hleih theih loh. Ka thlir leh vung vung thin. Mahni tawkah tha ka lo intih ve theih teh reng nen, phu lo ta ngawih ngawih hian ka inhria a. Mahse ka tan lo chuan ka phallo ve khanglang a. A nuih apiang chuan min nuih emaw ka lo ti a, ka lo khi ve vur vur zel lehnghal.
A tukah chuan vanneih-a-siamin ka vur lei laiin a rawn lei ve ta chat mai le! Min la be zui! Lawm tak ka ni. Chu mai a la nilo daihlima thutpuiah min la sawm cheu! Khuangpui leh kuangte nena ‘Aw Lalpa I malsawmna hlu’ tih hla kha sak mai ka duh rum rum. ‘Sawmtute hnar ngailo Lalisua’ iangin sawmna duhawm chu ka chhang a, ka va thu dun! ‘Pathian thil rel dan hi a va mak em!’. Duh dawn chu nise, a sumfai ken tur kan neih loh avanga hah-thi-kula ka phurh buh ban man zawng zawng hian vur leisak ka duh, mahse a eizo seng loving tih hlauh vang pawh nilovin chu thil erawh puitlin a ni ta lo.
Ka bula sawi awm tawk te te a hre phian a, kham lo takin chu hun rangkachak chu kan hmang liam a. A tukah pawh chuan am takin kan hmanga, duhthawh takin ka ti ti a, kham lo takin kan hmang zo. A tuka haw mai tur kan nih tawh avangin, zana kan hun neih chhun tlem te chu lungngaihna leh tahna ruamah kan hmang ral a. Thenna ram khawvela cheng kan nih miau avangin mittui nen mangtha tiin uichungin kan inthlah liam a tul ta si.

KA KHU LUIH

Israel fate Aigupta sal ata hruaichhuah an nih atanga, tun thleng hian ZIAL ZUK CHAWLH an neih ka hre ngai lova. Mahse kei erawh chu, zial zuk chawlh mamawh ber pawl ka ni si. ‘Mei khu ur a tlo’ ti a, chawfun aia dum bur theihnghilh hlau zawk thlah kal zel ka nih vang pawh a ni mahna, matric ka’n pass dek dek a, ka khu ve ta leih leih mai.

Khawvel a lo changkang zel a, Lungalhthei hmang rel te kan lo hmel hriat a. Chutah tawngkam thiamten lo hmang tangkaiin ‘Mipa lu leh rel lu chu a khu tur a ni’ an lo ti vei thul. Rel tluk zeta tlan chak ni ve ila chuan kan hlawkpui mahna. Tlan chak a hnehin, kan zawi tual tual chu a ni si. Chumi chang chawi chuan ka khu nasa tulh tulh nia!

Mithiamten a that lohzia leh hlauhawm zia min hrilh cham chi chung pawh a, nghei kan tum tak tlat loh vangin puipunnaah zuk min khap sak a. Mahse kan hotute’n vantlang hmunah MEI ZUK PHALNA HMUN min pe leh hlauh! A va lawmawm em! Kan hotute phalna hmun ngeiah ka pak khu leh ta talh talh mai le.

Tichuan, hun a lo kal zel a. Vantlang hmun atang pawh chuan thai bo kan ni leh a, ngamtlak te inah tak ngial pawh ka ti duk a. Mahse a rukin ka la khu vet vet reng thova. Luhlul chhuah vang em em pawh nilovin, ka hawi ka hawi a. ka ipte ka zen a, lighter leh sikret ka phawrh a, ka kianga dawrte pakhatah ‘kuhva in nei em?’ tih pahin ka tan kai a. Ka khu leh ta luih luih a!